- 707 -

1447. Jan. 26. Liegnitz.

Herzogin Elisabeth entscheidet zwischen Hans Schober und Thomas Brockendorf wegen der Mühle zu Prinkendorf.

Wir Elizabeth von gotis genaden herczogynne inn Slezien vnd frawe zcu Legnicz etc. bekennen offinlich mit desem breue allen den, die en sehen, horen ader lesen, als denne Hanns Schober an eyme vnd Thomas Bruckendorff am andern teile aller erer sachen vnd czweytracht, dy sy zusampne gehabt haben an vns vnd vnser mannen mechtiglichen bekomen sind, als von der molen wegin zu Princkendorff, vnd haben globit, was wir darobir worden awssprechen, dassie das genczlichen halden weiden. Also sprechen wir so: als Prockendorff mit furstlichen brieffen beweist hot, das her sulche czinse seschs malder gerstenczins vff der mole zu Princkendorff, im dorffe gelegin erblichen hot, das im Schober die forder geben vnd richten sal bey der phandunge durch vnseren cammerer, hette denne Schober icht schulde zu Prockendorff, dorumme mag her in mit rechte ansprechen ader vornemen; als, denne von der leen wegin, doran meynen wir selbis recht zuhaben vnd meynen vns des mit Prockendorff lossen billichen, werden wir recht haben, so meynen wir dobey zubleiben, worde aber Prockendorff recht haben, so meynen wir in auch dobey zu lossen. Incrafft disz brieffis mit vnserem anhangenden ingesigilt vorsigilt. Gegebin zcu Legnicz am donrstage noch Pauli conuersionis, noch Cristi geburth virczenhundert vnd dornoch im sebinvndvirczigisten jore. Dobey sint gewest vnser liebe getrawen Cristoff Dornheym, Segemund von der Leyppe, Heyncze von Panthnaw, Hanns Prippticz, Olbrecht Falkenhayn, Michel Borewicz vnd her Willewolt Lindener, dem desir brieff zu schreiben wart befolen.

O. d. St. L. No. 390. Das Wappensiegel an Pergamentstreifen.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866